Erlent

Einn skotinn af lögreglu eftir hnífaárás í London

Kolbeinn Tumi Daðason skrifar
Mikill fjöldi lögreglumanna er á vettvangi vegna árásarinnar.
Mikill fjöldi lögreglumanna er á vettvangi vegna árásarinnar. Getty Images/Chris J Ratcliffe
Karlmaður var skotinn til bana af lögreglunni í London um klukkan tvö í dag grunaður um hnífaárás á London Bridge í ensku höfuðborginni. Nokkur fjöldi manna slasaðist við árásina.

Þetta er það sem við vitum um árásina:

  • Tilkynnt var um hnífaárás á London Bridge um klukkan 14
  • Breska lögreglan brást við atvikinu sem um hryðjuverk væri að ræða
  • Vopnaðir lögreglumenn skutu árásarmanninn til bana á London Bridge
  • Nokkrir særðust í hnífaárásinni
  • Árásarmaðurinn var klæddur í gervisprengjuvesti
  • London Bridge verður áfram lokuð og lögreglumenn verða áberandi í grennd til að tryggja öryggi almennings
  • Lögreglan biðlar til almennings um myndbönd og myndir teknar af vitnum
  • Tæknideild lögreglu er við störf á vettvangi
Sky News er með beina fréttaútsendingu hér að neðan.

Breska lögreglan var laust fyrir klukkan þrjú í dag kölluð út að London Bridge vegna manns sem réðst að fólki vopnaður hnífi. Maðurinn er sagður hafa náð að særa nokkra að því er fram kemur á vef Breska ríkisútvarpsins BBC. Einn hefur verið skotinn af lögreglu.

Lögreglan í London segir atburðarásina enn óljósa en til segjast bregðast við atburðinum eins og um hryðjuverk sé að ræða.

Mikil skelfing greip um sig á meðal viðstaddra en lögregla hefur nú lokað umferð í báðar áttir. Vitni segjast hafa heyrt tvo skothvelli.

Fólk flúði af brúnni

Mikill fjöldi lörgeglumanna, margir hverjir gráir fyrir járnum, mætti á svæðið og beindi verkamönnum og ferðamönnum af svæðinu. Svæðið í kringum London Bridge er pakkað af háum skrifstofubyggingum, bönkum, veitingastöðum og krám. Starfsmönnum í byggingum hefur verið sagt að halda kyrru fyrir innandyra.

London brúin tengir viðskiptahverfi borgarinnar við suðurbakka árinnar Thames.

Lögreglan segir einn mann hafa verið tekinn höndum og nokkur fjöldi hafi særst.

Vitni lýstu því að hafa orðið vör við það sem virtust vera slagsmál á brúnni og svo heyrðust skothvellir. Sky News greindi frá því að sá sem var skotinn hafi verið meintur árásarmaður.

Heyrði skothvelli

Einar Orn, útvarpsmaður í London, fylgdist með því sem fram fór á svölum skrifstofubyggingar þar sem hann vinnur. Einar sat utandyra en á leiðinni inn eftir hádegishlé þegar hann sá allt í einu lögreglubíla mæta á svæðið. Svo heyrði hann hvelli.

„Við héldum að þetta væru byssuskot eða flugeldar, vorum ekki viss. Nokkrum mínútum síðar þá heyrðum við miklu fleiri byssuskot, fólk byrjaði að hlaupa af brúnni að götunum. Strætóarnir stoppuðu, fjöldi lögreglubíla og sjúkrabíla komu á svæðið svo það hefur margt verið að gerast,“ sagði Einar Orn í viðtali við BBC.

Hann segir mjög marga hafa verið á brúnni, líklega í kringum 300 hlaupandi á brúnni og nokkrir á götunni, en svo hafi bílar og strætóar blokkað útsýni hans.

Einar Orn birti þessi myndbönd í dag en fréttastofu er ekki kunnugt um hvort hann sé af íslensku bergi brotinn.

Lögreglan í London lækkaði viðbúnaðarstig sitt vegna hryðjuverkaárása þann 4. nóvember síðastliðinn. Fór hættustigið úr mjög miklu í töluvert sem þýðir að líkur voru taldar á hryðjuverkaárás en áður voru þær taldar miklar.

Íbúar og vegfarendur í London eru hvattir til að vera á varðbergi og tilkynna lögreglu taki það eftir einhverju grunsamlegu.

Að neðan má sjá myndbönd frá vettvangi í London.

Athugasemd ritstjórnar

Vinnustöðvun vefblaðamanna stendur yfir á Vísi. Fréttastofa óskaði eftir undanþágu til að geta flutt lesendum sínum fregnir af atburðunum í London sem gætu varðað öryggi Íslendinga á svæðinu. Undanþágunefnd Blaðamannafélags Íslands samþykkti undanþágubeiðnina.

Bretland England

Mest lesið


Fleiri fréttir

Sjá meira


×

Mest lesið