Sjáðu Turner skjóta Man Utd tímabundið á toppinn

Einn leikur var dagskrá úrvalsdeildar kvenna í knattspyrnu á Englandi í dag. Manchester United tók á móti Tottenham Hotspur og ólíkt leik karlaliða félagsins á dögunum þá var það Man Utd sem hafði betur í dag.

Eftir markalausan fyrri hálfleik var það Millie Turner sem stangaði knöttinn af alefli í netið eftir hornspyrnu á 67. mínútu og tryggði Man United þar með 1-0 sigur.

Sigurinn lyftir Man Utd upp á topp deildarinnar, allavega tímabundið. Liðið er með 10 stig að loknum fjórum leikjum en Arsenal og Everton koma þar á eftir með níu stig ásamt því að eiga leik til góða.

Á morgun er svo stórleikur Chelsea og Manchester City en bæði lið eru með sjö stig að loknum þremur leikjum.