Árangurinn framar vonum og segir góðan vin sinn á­stæðu þess að hann spili í dag

Fullyrða má að Alexander Aron Hannesson sé knattspyrnuóður. Ásamt því að vera hluti af liði Reynis Sandgerði sem fór upp úr 3. deild karla í sumar þá er hann með betri FIFA-spilurum landsins og er sem stendur í 3. sæti úrvalsdeildarinnar í eFótbolta. Þar spilar hann þó undir formerkjum Keflavíkur.

Alexander Aron var þó ekki viss um að taka þátt í úrvalsdeildinni þegar honum stóð það til boða. Honum fannst hann ekki nægilega góður, annað hefur svo komið á daginn.

„Það passar. Ég var ekkert alltof jákvæðu komandi inn í mótið en Aron Ólafsson [Framkvæmdastjóri Rafíþróttasamtaka Íslands] er í raun ástæðan fyrir því að ég ákveð að taka á endanum þátt. Gríðarlega sannfærandi einstaklingur þar á ferð.“

Hinn 25 ára gamli Alexander er eins og áður sagði ekki aðeins að iðka knattspyrnu fyrir framan tölvuna heima hjá sér heldur æfir hann einnig. Eftir að hafa hafið meistaraflokks feril sinn með Völsungi á Húsavík tvítugur að aldri þá færði hann sig yfir á Suðurnesin þar sem hann gekk í raðir Reynis í Sandgerði árið 2016.

Þar hefur hann leikið síðan ef frá er talið stutt stopp í Hafnafirði með KÁ sem leikur í 4. deildinni sumarið 2019. Alexander bjó í Hafnafirði á yngri árum, lék hann með bæði FH og Haukum áður en ferðinni var heitið á Akureyri.

Hvernig gengur að púsla saman „alvöru“ fótbolta og eFótbolta?

„Það gengur í rauninni bara mjög vel. Það er eflaust aðeins auðveldara í dag vegna ástandsins í heiminum, töluvert færri æfingar hjá okkur í Reyni eins og staðan er búin að vera síðustu vikur. Síðan reynir maður að taka tölvuspilunina heima í aðeins meiri rólegheitum með félögunum, alltaf gaman að taka nokkra leiki og æfa sig aðeins.“

„Þessa dagana þá er mjög lítið gert fyrir utan FIFA og síðan æfingar þess inn á milli ef þær koma upp, nýjasti leikurinn af FIFA var að koma út svo núna er klárlega tíminn sem maður þarf að nýta í að læra betur og betur inn á hann,“ sagði Alexander aðspurður hvort það væri eitthvað annað gert þessa dagana heldur en að æfa með Reyni og spila FIFA heima fyrir.

Alexander er tiltölulega nýfarinn að spila FIFA og getur í raun þakkað vini sínum fyrir það.

„Ég er búinn að vera í fótbolta allt mitt líf, í raun bara frá því ég man eftir mér. Lífið hefur meira og minna verið fótbolti og það er ekkert að fara breytast, hefði heldur ekki viljað hafa það neitt öðruvísi. Það er hins vegar frekar stutt síðan ég byrjaði í FIFA af einhverju alvöru viti.“

„Keypti mér Playstation undir lok árs 2017 svo kom Grétar Karlsson félagi minn einn daginn með FIFA og henti honum í andlitið á mér. Hann var alveg kominn með nóg af því að koma í heimsókn til mín og geta aldrei hoppað í nokkra leiki svo í raun er það honum að þakka að ég geti eitthvað í þessum leikjum í dag.“

Keflavík var að stofna rafíþróttadeild. Kallast hún Rafvík og gæti verið algjör umbylting í geiranum fyrir Reykjanesbæ.

„Það er bara algjör snilld. Ég hef verið í samskiptum við stofnanda deildarinnar [Arnar Már Halldórsson[ í nokkra mánuði og reynt að vera með puttann á púlsinum varðandi allt sem tengist þessu. Vona að Arnar verði í bandi við mig varðandi framhaldið hjá liðinu og ég er klárlega opinn fyrir öllu sem tengist framtíðinni hjá Rafvík.“

„Þetta opnar mjög margar dyr á Suðurnesjum, það eru fullt af yngri krökkum og einnig eldri sem halda sig heima hjá sér að spila tölvuleiki og eru með þvílíka hæfileika í því sem þau gera, vonandi ná Rafvík að smala þessu fólki að sér og mynda sterkari heild á komandi árum.“

Segir stöðuna framar vonum 

Alexander er sem stendur í 3. sæti í úrvalsdeildinni í eFótbolta og í harðri baráttu um toppsætið. Það er framar vonum miðað við væntingar hans. Er hann aðeins stigi á eftir 2. sæti og tveimur stigum á eftir Róberti Daða Sigurþórssyni sem trónir á toppnum.

„Ekki spurning að það sé aðeins framar vonum. Ég kom inn í þetta mót alfarið út frá því að Aron sannfærir mig um að taka þátt og það er bara nákvæmlega það sem ég ætlaði að gera, taka þátt og reyna að njóta mín.“

„Ég var ekki með neinar væntingar og er ekki enn, er bara að reyna skemmta mér sem best að spila við þá bestu. Þessir strákar í mótinu eru allir snillingar,“ sagði Alexander auðmjúkur.

„Ég er ekkert að um að vinna mótið, ef það kæmi fyrir að ég slysist á toppinn í lokin þá skála ég sennilega með einni Pepsi Max Lime með Dabba frænda mínum og þakka honum fyrir stuðninginn síðustu ár.“

Mæli með að foreldrar nýti sér það sem rafíþróttafélög hafa upp á að bjóða

-„Mæli eindregið með því að þeir foreldrar sem eiga börn sem hafa áhuga á tölvuleikjum kynni sér það sem rafíþróttafélögin í kring hafi upp á bjóða. Eins skrítið og það hljómar að vera ýta undir það að yngri kynslóðin sé að eyða tímanum sínum í tölvuleiki þá eru svo ótrúlega breyttir tímar í dag. Það eru rosalega stór tækifæri farin að fylgja þessu öllu.“

„Rafíþróttadeildir hjálpa líka gríðarlega við að kenna krökkum á takmörkin varðandi spilatíma og allt svoleiðis, ég veit allavegana að þegar ég var yngri þá er þetta klárlega eitthvað sem ég hefði haft brennandi áhuga á að taka þátt í,“ sagði Alexander að lokum.