Víkingar von­brigði tíma­bilsins: „Fór ein­hvern veginn allt til fjandans“

Arnar Gunnlaugsson, þjálfari Víkings í Pepsi Max deild karla, mætti í uppgjörsþátt Pepsi Max Stúkunnar þar sem lið hans var valið vonbrigði tímabilsins. Ræddi hann við Kjartan Atla Kjartansson um hvað hefði betur mátt fara og það fáa sem fór vel.

Viðtalið má sjá í heild sinni í spilaranum hér að neðan.

„Klárlega, ég er virkilega ósáttur með stigasöfnun liðsins. Við ætluðum okkur stóra hluti, eins og hefur komið fram. Okkar vonir og væntingar voru að ná lengra í deildinni og stíga skrefið fram á við, reyna halda áfram þeirri vegferð sem við vorum á þegar við vorum bikarmeistarar. Svo fór einhvern veginn allt til fjandans,“ sagði Arnar aðspurður hvort hann gæti tekið undir að Víkingar væru vonbrigði tímabilsins.

Hvað fór til fjandans?

„Alltaf þegar maður nefnir ástæður er maður að væla og ég þoli ekki þjálfara sem væla of mikið í fjölmiðlum en má ég samt væla aðeins,“ sagði Arnar og glotti. Hann hélt svo áfram.

„Ég held að Covid-pásan í byrjun hafi farið illa með nokkur lið og vel með sum lið. Við vorum á góðu róli í vetur og svona í fyrsta skipti í sögu Víkings vorum við með alla okkar leikmenn klára í nóvember. Æfingatímabilið var lagt upp þannig að byrja á fullu í maí og við vorum á góðu róli, að vinna góða sigra. Svo kom pásan og það tók okkur smá tíma að ná áttum eftir þessa pása.“

„Lykilmenn okkar eru komnir til ára sinna [Sölvi Geir Ottesen og Kári Árnason]. Þetta á ekkert bara við um okkar lið, Íslandsmeistarar Vals áttu erfitt uppdráttar í byrjun móts. Svo náðum við okkur aðeins á strik í 3. umferð og unnum FH sannfærandi. Svo kemur fræga umferðin í þeirri 4. þar sem við áttum hörkuleik við KR og hann endaði illa fyrir okkur. Eftir það var þetta orðið smá panic, kannski út af því hvað við ætluðum okkur stóra hluti og það kom upp örvænting í okkar leik.“

„Við unnum tvo leiki eftir Valsleikinn en mestu vonbrigðin voru á útivelli gegn Gróttu. Vorum búnir að vinna tvo leiki, þar af Skagann 6-2 og sá leikur var jafntefli. Eftir það var eins og menn misstu móðinn, misstu hausinn.“

Víkingar fengu fjölda rauðra spjalda í sumar, af hverju?

„Kannski eru menn yfir spenntir, vilja og meina vel. Spjöldin í KR leiknum, það var yfir spenningur í ýmsu þó það megi alltaf deila um hvað var og hvað var ekki rautt. Rauða spjaldið gegn Stjörnunni, mér fannst það ekki rautt ef ég á að segja alveg eins og er. Spjaldið út í Ljubljana var klárlega rautt.“

„Þetta gerðist fyrir okkar reynslumestu leikmenn sem maður myndi halda að væri ekki fyrir fram líklegasti hópurinn til að fá rauð spjöld. Ég túlka þetta þannig að þeim hafi langað þetta svo mikið fyrir klúbbinn sinn og þegar menn fundu að þetta var að fara úr okkar höndum kemur yfir spenningur og menn taka ekki alveg réttar ákvarðanir.“

Hvað var Arnar sáttur með í sumar?

„Ég var rosalega sáttur með að við mættum í hvern einasta leik og spiluðum okkar leik. Það er ákveðinn grunnur til staðar og það þarf ekki að umturna öllu fyrir næsta tímabil.“

Hér að neðan má sjá viðtalið í heild sinni þar sem Arnar ræðir einnig hvaða leikkerfi hentar Víkingum best og margt fleira.