Heimir Hallgríms: Farið vel með Víði því það er bara til eitt svona eintak í heiminum

Heimir Hallgrímsson, fyrrum landsliðsþjálfari karlalandsliðsins í fótbolta, var gestur Heimis Karlssonar og Gunnlaugs Helgasonar í „Bítinu“ á Stöð 2 Sport, Bylgjunni og Vísi í morgun. Heimir er staddur út í Katar þar sem hann þjálfar Stjörnudeildarliði Al-Arabi.

„Staðan hjá mér er eins og heima. Það eina er að við erum ekki með neinn Víði hérna en annars er hún bara ósköp svipuð,“ sagði Heimir Hallgrímsson.

„Það er pláss fyrir Víði í teyminu mínu en mér fannst hann ekkert vilja fara frá Íslandi þannig að ég efast um að geta náð honum hingað,“ sagði Heimir í léttum tón.

„Hér er bara ástandið svipað og á Íslandi. Það eru hátt í 700 manns sýktir hérna og einn látinn. Þeir skráðu þrjú ný tilfelli í gær og virðast vera á toppnum á þessu því þetta hefur aðeins minnkað núna, Vonandi erum við á svipuðum stað og Ísland,“ sagði Heimir.

Heimir er að þjálfa Al-Arabi liðið er einhverjar æfinga í gangi núna?

Einn leikmaður með völlinn í einu

„Nei en við erum reyndar með einstaklingsæfingar. Leikmenn fá að bóka völlinn en það er bara einn leikmaður með völlinn í einu. Stundum er þjálfari með leikmanni en þeir koma frá ellefu á morgnanna til sjö á kvöldin. Þeir reyna að halda sér við,“ sagði Heimir.

„Maður öfundar Íslendinga svolítið því Ísland er líklega upplýstasta þjóðfélag í heimi. Þar á Víðir og þríeykið heiður skilinn fyrir það að fólk verið minna hrætt og veit nákvæmlega stöðuna. Þetta er erfiðara fyrir okkur því við skiljum ekki arbískuna nægilega vel. Það er því erfiðara að sækja sér upplýsingar,“ sagði Heimir.

„Við fylgjumst vel með öllum fréttum heima og þar er bara fólkið okkar. Það er erfitt að vera svona langt frá fólkinu sínu. Við fylgjumst betur með fréttum á Íslandi heldur en fréttum héðan,“ sagði Heimir.

Ef ég að vera eigingjarn þá er þetta slæmt fyrir okkur

Svo gæti farið að landskeppnir fótboltans verði ekki kláraðar á tímabilinu og engir meistarar krýndir vegna kórónuveirunnar. En hvað finnst Heimi um slíkt?

„Persónulega finnst mér það eina rétt að gera það en ef maður á að vera eigingjarn og hugsa um liðið sitt þá er þetta slæmt fyrir okkur því erum á góðri siglingu og komnir í undanúrslit í tveimur bikarkeppnum. Við erum að gera bestu hluti sem félagið hefur gert í tugi ára jafnvel. Ég held að það eina rétta sé að fresta þessu, leyfa þessu að líða hjá og sjá svo til,“ sagði Heimir en honum finnst það á mönnum út í Katar að þeir ætli að klára mótið þar.

Heimir er Liverpool maður og vildi eins og aðrir stuðningsmenn sjá liðið fá loksins enska meistaratitilinn.

Erum þjáningarbræður hérna

„Ég er dyggur stuðningsmaður Liverpool og við erum þjáningarbræður hérna. Við erum í svipaðri stöðu að gera okkar besta í langan tíma. Ef maður hugsar bara um rassgatið á sjálfum sér en þetta er bara miklu miklu stærra en hérna,“ sagði Heimir.

„Það góða við Katar er að það er gott veður hérna og maður getur setið úti. Maður getur lokað sig úti í góða veðrinu og það er það góða við þetta. Tíminn er aðeins fljótari að líða heldur en í kulda, lægðum og veseni,“ sagði Heimir.

Víðir Reynisson, yfirlögregluþjónn hjá ríkislögreglustjóra, var í settinu hjá Heimi og Gunnlaugi af því að hann var í viðtali á undan Heimi. Heimir kastaði á hann kveðju.

Hinn undursterki 1967 árgangur úr Eyjum

„Það er bara til eitt svona eintak í heiminum. Farið þið vel með þennan mann, hann þarf líka á hvíldinni að halda þessi maður til þess að hann geti haldið áfram að standa sig eins vel,“ sagði Heimir og bætti við:

„Hann kemur af þessum undursterka 1967 árgangi frá Vestmannaeyjum. Þetta eru sterk eintök,“ sagði Heimir léttur að lokum en Heimir er af sama árgangi úr Eyjum.

Það má sjá allt viðtalið við Heimi hér fyrir neðan