Tveir Fylkismenn byrja í banni og bönn taka gildi fyrr

Á meðal breytinga má nefna að sektarheimildir aga- og úrskurðarnefndar hafa verið hækkaðar. Sektir vegna atvika sem geta „skaðað ímynd knattspyrnunnar“ geta til að mynda að hámarki numið 200 þúsund krónum nú í stað 100 þúsund króna áður, auk hugsanlega leikbanns eins og áður.

Önnur veigamikil breyting er sú að leikbönn vegna gulra spjalda taka nú gildi í hádegi daginn eftir leik, en ekki í hádegi næsta föstudag eins og verið hefur.

Leikmenn fá eins leiks bann ef þeir fá 4 áminningar á sama Íslandsmóti, og eins leiks bann við þriðju hverju áminningu eftir það. Hingað til hefur það verið þannig að ef leikmaður fær fjórðu áminningu í leik á sunnudegi hefur hann mátt spila leik á fimmtudegi, og bannið svo tekið gildi á föstudegi. Með nýju breytingunum er komið í veg fyrir þetta.

Þrír úr Pepsi Max-deild karla í banni

KSÍ hefur gefið út hvaða leikmenn og þjálfarar þurfa að byrja leiktíðina á að taka út leikbann vegna agabrota á síðustu leiktíð.

Þrír leikmenn í Pepsi Max-deild karla þurfa að taka út eins leiks bann og eru tveir þeirra úr Fylki. Þetta eru þeir Daði Ólafsson og fyrirliðinn Ragnar Bragi Sveinsson. Ragnar Bragi fékk beint rautt spjald í næstsíðasta deildarleik Fylkis í fyrra, í 2-1 sigri gegn KR, en Daði fékk tvö gul spjöld og þar með rautt í 4-1 tapi gegn Breiðabliki í lokaleik Fylkis.

Daði og Ragnar Bragi missa því af leik Fylkis gegn FH laugardaginn 1. maí í Árbænum.

KR-ingurinn Oddur Ingi Bjarnason þarf einnig að taka út eins leiks bann, eftir rautt spjald í síðasta leik sínum fyrir Grindavík þar sem hann var að láni í fyrra.

Afturelding verður án Oskars Wasilewski í fyrstu tveimur leikjum sínum í Lengjudeildinni og Guðjón Pétur Lýðsson missir af fyrsta leiknum hjá ÍBV.

Enginn leikmaður úr Pepsi Max-deild eða Lengjudeild kvenna byrjar leiktíðina í banni.