Boltastrákarnir voru búnir að segja mér að koma til sín

Fylkir vann 4-2 sigur gegn Keflavík í 5. umferð Pepsi Max-deildarinnar í kvöld, eftir að hafa verið á botni deildarinnar að loknum fjórum leikjum með aðeins tvö stig. Nú eru Fylkismenn í 7. sæti.

„Jafnteflið uppi í Kórnum, eftir mark á síðustu stundu, var þungt högg. Í leiknum við Leikni hefðum við getað jafnað í lokin en í staðinn fór þetta á hinn veginn. Við þurftum að gera betur og sýna að við eigum að vera komnir með fleiri stig en við erum komnir með,“ sagði Orri Hrafn.

Keflavík komst reyndar yfir strax í upphafi leiks í kvöld en Fylkismenn svöruðu því af krafti:

„Það er erfitt að fá á sig mark svona úr föstu leikatriði en mér fannst við töluvert betri á hverri mínútu eftir markið. Við rifum okkur í gang stjórnuðum fyrri hálfleik algjörlega. Við komum líka grimmir út í seinni hálfleikinn, þó að það hafi minnkað aðeins eftir fjórða markið okkar, en menn voru tilbúnir að gera allt til að ná í þessi þrjú stig.“

Orri Hrafn skoraði fyrra mark sitt í kvöld þegar hann kom Fylki yfir í fyrri hálfleik. Seinna markið kom úr sérlega glæsilegu skoti utan teigs frá þessum uppalda Fylkismanni, sem um tíma lék með unglingaliðum Heerenveen í Hollandi en sneri heim í fyrra. Orri Hrafn fagnaði seinna markinu vel og innilega:

„Þeir voru þarna nokkrir boltastrákar á vellinum búnir að segja mér að koma til sín ef að ég myndi skora. Ég hljóp til þeirra og stóð við mitt,“ sagði Orri Hrafn brosandi.

„Að sjálfsögðu er frábært að skora og hvað þá tvö mörk. Ég var tilbúinn, vissi mitt hlutverk í kvöld og ég er mjög sáttur. Aðalatriðið var þó að fá þrjú stig.“