Biden sendir hermenn til Austur-Evrópu

Um tvö þúsund hermannanna verða sendir frá Fort Bragg í Bandaríkjunum til Póllands og Þýskalands. Þeir verða sendir af stað í vikunni. Þá verða um þúsund hermanna sem eru þegar í Þýskalandi sendir til Rúmeníu.

Gífurleg spenna er í Austu-Evrópu en Rússar hafa komið fleiri en hundrað þúsund hermönnum fyrir víða við landamæri Úkraínu, auk skriðdreka, vopna og flugvéla. Rússar hafa krafist þess að Atlantshafsbandalagið meini Úkraínu aðkomu að hernaðarbandalaginu í framtíðinni og vísi ríkjum Austur-Evrópu úr bandalaginu.

Þar á meðal er Rúmenía en kröfum Rússa hefur þegar verið hafnað og viðræður milli Rússa og vesturveldanna svokölluðu eru strand.

Eins og tekið er fram í frétt AP fréttaveitunnar hefur Biden sagt að ekki standi til að senda hermenn til Úkraínu og koma með beinum hætti að vörnum landsins komi til innrásar. Hins vegar hafa Bandaríkin sent vopn til Úkraínu.

Bandaríkjamenn hafa einnig sett um 8.500 hermenn í viðbragðsstöðu fyrir mögulega flutninga til Evrópu. Fyrir eru um 75 til 80 þúsund bandarískir hermenn með fasta viðveru í Evrópu.

Vladimír Pútín, forseti Rússlands, tjáði sig í fyrsta sinn um ástandið í gær og þá sakaði hann Bandaríkin um að reyna að nota Úkraínu sem tól til þess að draga tennurnar úr Rússlandi.

Svörum NATÓ við kröfum Rússa var lekið til El País (áskriftarvefur) en þar segir að hernaðarbandalagið sé varnarbandalag og ógni Rússum ekki á nokkurn hátt. Eina markmið þeirra sé að stuðla að friði og frelsi í Evrópu og Norður-Ameríku. Þar var kallað eftir frekari viðræðum og ítrekað að innlimun Rússlands á Krímskaga árið 2014 væri ólögleg og sömuleiðis þyrfti að binda enda á átökin í austurhluta landsins þar sem aðskilnaðar sem studdir eru af Rússum hafa náð tökum á stórum svæðum.

Þá leggur NATÓ til að ríki Evrópu virði fullveldi og landamæri annarra ríkja og ráðamenn forðist ógnanir. Þá segir sömuleiðis að Rússar ættu að fjarlægja hersveitir sínar í Úkraínu, Georgíu og Moldóvu og að þær séu innan landamæra þessara ríkja án heimildar frá þarlendum yfirvöldum.

Í svörunum, sem lesa má hér, má einnig finna fjölda annarra ráðleggingar sem NATÓ segir að myndu hjálpa til við að tryggja frið.

Þar segir þó einnig að í meira en 30 ár hafi forsvarsmenn NATÓ reynt að mynda gott samband við Rússa. Engu öðru ríki hafi verið boðnar sambærilegar aðgerðir í gegnum árin en ráðamenn í Rússlandi hafi brotið gegn því trausti sem þeim hafi verið sýnt og ógnað grunnstoðum þess kerfis sem hafi verið komið á til að tryggja frið í Evrópu og í heiminum.