Fótbolti

Bannað að mæta á leikinn við Alfons og félaga eftir lætin gegn Arsenal

Sindri Sverrisson skrifar
Stuðningsmenn PSV Eindhoven eru hér á Emirates-leikvanginum. Þar voru þeir ekki til fyrirmyndar og mega ekki mæta til Noregs, auk þess sem PSV fékk sekt.
Stuðningsmenn PSV Eindhoven eru hér á Emirates-leikvanginum. Þar voru þeir ekki til fyrirmyndar og mega ekki mæta til Noregs, auk þess sem PSV fékk sekt. Getty/Joris Verwijst

UEFA hefur ákveðið að refsa hollenska knattspyrnufélaginu PSV Eindhoven með áhorfendabanni og sekt vegna óláta stuðningsmanna félagsins á heimavelli Arsenal í síðustu viku.

Stuðningsmenn PSV köstuðu hlutum til, sköpuðu óróa á meðal áhorfenda og unnu skemmdir á leikvangi Arsenal, í 1-0 tapinu gegn Arsenal í Evrópudeildinni þar sem Granit Xhaka skoraði sigurmarkið á 70. mínútu.

UEFA ákvað að refsa fyrir þetta með 40.000 evra sekt, sem jafngildir 5,7 milljónum króna, auk þess að banna PSV að selja miða á næsta útileik sinn í Evrópudeildinni. Þá hefur PSV þrjátíu daga til að borga Arsenal skaðabætur vegna þeirra skemmda sem unnar voru.

Næsti útileikur PSV er gegn Bodö/Glimt, liði Alfons Sampsted, í Noregi í næstu viku.

Áður en að þeim leik kemur spilar PSV hins vegar á heimavelli sínum gegn Arsenal síðdegis í dag, á meðan að Bodö/Glimt sækir Zürich heim. Ef að Bodö fær ekki færri stig en PSV í dag verður leikur liðanna í Noregi í næstu viku úrslitaleikur um að fylgja Arsenal upp úr riðlinum.

Evrópudeild UEFA Fótbolti

Mest lesið


Fleiri fréttir

Sjá meira


×

Mest lesið