Berjumst saman fyrir réttindum fatlaðs fólks!

Liðið ár hefur verið ánægjulegt og farsælt og viljum við þakka fyrir þann magnaða stuðning sem við höfum fundið á árinu. Þar ber sérstaklega að nefna alla þá einstaklinga sem hafa gerst mánaðarlegir styrktaraðilar samtakanna á árinu. Við erum með magnaðan hóp fólks sem styrkir samtökin í hverjum einasta mánuði og þeim sem hafa styrkt okkur með því að versla hið árlega almanak sem einnig er happadrættismiði. Í ár prýðir almanakið listaverkum eftir 12 fatlaða listamenn sem hafa vakið athygli og hafa verk þeirra verið til sýnis á einkasýningjum sem og samsýningum hér á landi og erlendis.

www.throskahjalp.is/almanak

Ykkar stuðningur gerir okkur kleift að sinna okkar mannréttindabaráttu af krafti!

Baráttumál samtakanna fyrir hagsmunum og réttindum fatlaðs fólks eru fjölmörg og upptalning yrði ansi löng ef ég ætlaði að segja frá öllum okkar verkefnum á árinu. Ég vil þó telja hér upp nokkur:

Aðgengi að námi og atvinnu

Herferðin okkar ,,Hvað er planið?‘‘ gekk mjög vel og náðum við augum og eyrum landsmanna varðandi mikilvægi þess að fatlað fólk og ungmenni hafi tækifæri til að taka þátt í samfélaginu með tilliti til aðgengi að námi og atvinnu.

Stafrænt aðgengi

Einnig stóðum við fyrir málþingi um aðgengi fatlaðs fólks að stafrænum heimi. Samtökin hafa vakið athygli á stöðunni er varðar skert aðgengi fatlaðs fólks að rafrænum skilríkjum og tekið þátt í að reyna að finna lausn á stöðunni og höfum við lagt áherslu á að gerður verði rammi um stafrænt aðgengis- og réttindamál er varða mannréttindi í breiðum skilningi og mikilvægi þess er varðar breytingar og þróun og nýtingu stafrænnar tæki að fatlað fólk mæti ekki hindrunum og aðgreiningu.

Sýndarveruleiki

Við studdum við fötluð börn og ungmenni með sýndarveruleikaverkefni, en það felst í því að búa til sýndarveruleika þar sem fólk með þroskahömlun getur æft sig í að framkvæma athafnir sem virðast framandi og jafnvel ógnvekjandi í fyrstu. Í sýndarveruleika er hægt að æfa sig aftur og aftur við öruggar aðstæður þangað til viðkomandi öðlast öryggi til að stíga skrefin í raunveruleikanum.

Fatlað fólk í Úkraínu

Samtökin stóðu fyrir söfnun fyrir fatlað fólk í Úkraínu, í samstarfi við önnur hagsmunafélög fatlaðs fólks og ríkisstjórn Íslands. Staða fatlaðs fólks í Úkraínu er skelfilegt og alveg ljóst að fatlað fólk verður sérstaklega illa úti þegar kemur að átökum og er skilið eftir og að það sé án aðstoðar og stuðnings. Það var því magnað að finna samstöðuna og samhuginn í kringum söfnunina og safnaðist rúmar 17 milljónir. Við sendum sérstakar þakkir til allra sem tóku þátt í söfnuninni og lögðust á eitt við að veita þessa lífsnauðsynlegu hjálp.

Íþróttaiðkun fatlaðs fólks

Samtökin tóku þátt í ráðstefnu um tækifæri fatlaðra barna og ungmenna í íþróttastarfi og í framahaldinu var undirrituð samstarfsyfirlýsing milli félags- og vinnumarkaðsráðuneytisins, mennta- og barnamálaráðuneytisins og heilbrigðisráðuneytisins um verkefnið ,,Farsælt samfélag fyrir öll – brúum bilið’’ en það miðar að því að efla íþróttaiðkunn fatlaðs fólks, ekki síst fatlaðra barna og ungmenna.

Auk þessa má líka nefna nokkur þeirra atriða sem við leggjum okkur fram um á hverju ári, til dæmis var Múrbrjóturinn afhentur á alþjóðadegi fatlaðs fólks til einstaklinga sem hafa látið til sín taka í að auka þátttöku fatlaðs fólks í samfélaginu, aðhald og samstarf við stjórnvöld um málefni fatlaðs fólks, áhersla á auðlesið efni og aukin aðsókn fyrirtækja og stofnana í þá þjónustu okkar og gott samstarf við fyrirtæki sem hafa sýnt metnað í að stuðla að viðeigandi aðlögun fyrir fatlað fólk á sínum vinnustað.

Þetta eru bara örfá af þeim verkefnum sem samtökin hafa unnið að á árinu. Framundan er nýtt ár og starfsfólk samtakanna mun taka kraftinn og þrautseigjuna með sér inn í komandi ár.

Hvað er framundan?

Verkefnin framundan eru ekki síður mikilvæg, en þar ber helst að nefna að á þessu ári hafa samtökin tekið þátt í landsáætlun um innleiðingu á samningi Sameinuðu þjóðanna um réttindi fatlaðs fólks og vonir standa til þess að á nýju ári verði samningurinn lögfestur og að stofnuð verði ný Mannréttindastofnun, en það kemur fram í stjórnarsáttmála ríkisstjórnarinnar.

Fatlað fólk og hagsmunasamtök þess hafa hikað við að fagna þessum fyrirheitum stjórnvalda af þeirri einföldu ástæðu að alltof of oft hafa efndir ekki fylgt svona loforðum sem íslenskir valdhafar hafa gefið fötluðu fólki.

Ýmislegt bendir þó til að nú fylgi hugur máli því að nú er hafin framkvæmd sérstakrar landsáætlunar um innleiðingu á samningi Sameinuðu þjóðanna um réttindi fatlaðs fólks undir forystu þeirra Katrínar Jakobsdóttur, forsætisráðherra og Guðmundar Inga Guðbrandssonar, félags- og vinnumarkaðsráðherra.

Þetta eru mjög jákvæð tíðindi og verður að hrósa þeim Katrínu og Guðmundi Inga fyrir þeirra frumkvæði í þessu mikilvæga mannréttindamáli. Við munum halda áfram að eiga gott samstarf við ríkisstjórnina um málefni fatlaðs fólks til að tryggja áframhaldandi árangur í að bæta hag fatlaðs fólks og fjölga tækifærum þeirra í samfélaginu.

Kærar þakkir fyrir stuðninginn á liðnu ári og munum við halda áfram baráttu okkar fyrir réttinda- og hagsmunamálum fatlaðs fólks eins og við höfum gert frá árinu 1976.

Óska ég ykkur gleðilegrar hátíðar og farsældar á komandi ári.

Höfundur er formaður Landssamtakanna Þroskahjálpar.