Innlent

For­eldrar bíða svara: Segja Safamýrina eins og lestarstöð fulla af iðnaðarmönnum

Ellen Geirsdóttir Håkansson skrifar
Foreldrafélag leikskólans segir mat á húsinu ekki liggja fyrir.
Foreldrafélag leikskólans segir mat á húsinu ekki liggja fyrir. Vísir/Vilhelm

Ellefu vikur eru nú liðnar frá því að foreldrum barna í leikskólanum Hlíð var tilkynnt að flytja þyrfti starfsemina vegna myglu. Foreldrafélag leikskólans líkir leikskólaplássi í Safamýri, þar sem hluta barnanna var komið fyrir, við kalda lestarstöð fulla af iðnaðarmönnum. Foreldrar óska eftir fundi með skóla- og frístundasviði ásamt eignaskrifstofu borgarinnar.

Í lok október var leikskólanum Hlíðum lokað með tilheyrandi óþægindum fyrir börn, foreldra og starfsfólk. Starfsemin var flutt á þrjá staði vegna ástandsins, á Brákarborg í Sundum, Klambra og Litlu-Hlíð en upphaflega var foreldrum tilkynnt að ástandið myndi standa yfir í sex vikur, þá átti starfsemin að hefjast aftur í Safamýrarskóla. ´

Í Safamýrarskóla voru þó fyrir nemendur Nóaborgar en mygla fannst einnig í þeirra húsnæði og biðu nemendur Hlíðar eftir að mál Nóaborgar yrðu leyst til þess að fá plássið.

Þegar fréttastofa ræddi við meðlim foreldrafélags leikskólans Hlíðar, Fríðu Sigurðardóttur, þann 9. nóvember síðastliðinn höfðu foreldrar sent bréf á alla þá aðila sem málið varðaði. Svar hafði borist frá Degi B. Eggertssyni, borgarstjóra þar sem hann sagðist telja málið vera í góðum höndum hjá eignasviði borgarinnar.

Nú hefur foreldrafélagið sent annað bréf til skóla- og frístundasviðs ásamt eignaskrifstofu borgarinnar.

Í bréfinu kemur fram að í desember síðastliðnum hafi foreldrum verið tilkynnt að gera ætti við húsnæðið og koma starfsemi leikskólans í gang þar aftur. Þau benda þó á ákveðna galla á því og segja enga vinnu við mat á húsinu hafa farið fram og þá sé niðurrif ekki hafið.

„Foreldrar sendu bréf á skóla-og frístundarsvið og eignaskrifstofu Reykjavíkurborgar þann 6. desember og fögnuðu þeirri ákvörðun að gera ætti við húsnæði Stóru Hlíðar. Þeir lögðu mikla áherslu á að faglegur verkefnastjóri yrði ráðinn til þess að sjá um framkvæmdina og að tryggt yrði að útboð og pantanir yrðu gerðar tímanlega svo verkið ynnist innan tímaramma,“ segir í bréfinu.

Foreldrar hafa nú beðið í ellefu vikur. Vísir/Vilhelm

Þau taka fram að starfsemin virðist ganga ágætlega í Litlu-Hlíð en líkja aðstöðunni í Safamýri við lestarstöð.

„Ágætlega virðist hafa tekist að framkvæma mótvægisaðgerðir í húsnæði Litlu Hlíðar án mikillar röskunar fyrir börnin á meðan Safamýri er eins og lestarstöð þar sem börnin deila húsnæðinu með iðnaðarmönnum með tilheyrandi látum, kulda, bleytu og ónæði. Allt kapp þarf að leggja á að þeirri vinnu ljúki hratt og vel,“ segir í bréfinu.

Þá reikni foreldrar með því að verk- og tímaáætlun muni liggja fyrir þann 16. janúar næstkomandi en þau hafi óskað eftir því að áætlunin lægi fyrir eigi síðar en 15. janúar.

„Þá óska foreldrar einnig eftir upplýsingum um hvernig viðgerðum verði háttað við húsnæði Litlu Hlíðar sem fram á að fara í sumar, hvort og hvernig þær muni hafa áhrif á skólastarfið og hvenær þær eru ráðgerðar,“ skrifa foreldrar.

Bréf foreldra má sjá í heild sinni hér að neðan.

Bréf foreldrafélags leikskólans á Hlíðum til skóla- og frístundasviðs-og eignaskrifstofu borgarinnar. 

dag eru ellefu vikur liðnar frá því að foreldrum barna í Leikskólanum Hlíð var tilkynnt að flytja þyrfti leikskólann vegna heilsuspillandi húsnæðis. Í byrjun desember var foreldrum tilkynnt að fyrirhugað væri að gera við húsnæðið og flytja starfsemi leikskólans þangað aftur. Telja sumir að um friðþægingu hafi verið að ræða enda hefur leikskólahúsnæðið ekki verið fulltæmt, engin vinna við ítarlegt mat á ástandi húsnæðisins verið framkvæmd og niðurrif ekki hafið.

Barnahópurinn er nú á tveimur stöðum; á Litlu Hlíð og í Safamýri. Ágætlega virðist hafa tekist að framkvæma mótvægisaðgerðir í húsnæði Litlu Hlíðar án mikillar röskunar fyrir börnin á meðan Safamýri er eins og lestarstöð þar sem börnin deila húsnæðinu með iðnaðarmönnum með tilheyrandi látum, kulda, bleytu og ónæði. Allt kapp þarf að leggja á að þeirri vinnu ljúki hratt og vel.

Foreldrar sendu bréf á skóla-og frístundarsvið og eignaskrifstofu Reykjavíkurborgar þann 6. desember og fögnuðu þeirri ákvörðun að gera ætti við húsnæði Stóru Hlíðar. Þeir lögðu mikla áherslu á að faglegur verkefnastjóri yrði ráðinn til þess að sjá um framkvæmdina og að tryggt yrði að útboð og pantanir yrðu gerðar tímanlega svo verkið ynnist innan tímaramma. Óskuðu foreldrar eftir því að nákvæm verk-og tímaáætlun fyrir Stóru Hlíð lægi fyrir ekki seinna en 15. janúar. Reikna foreldrar enn með því að fá þessa áætlun í hendurnar mánudagsmorguninn 16. janúar ásamt upplýsingagjöf um þá vinnu sem fram hefur farið varðandi húsnæði borgarinnar á Klambratúni og deiliskipulagsvinnu vegna Ævintýraborgar við Björtuhlíð. Þá óska foreldrar einnig eftir upplýsingum um hvernig viðgerðum verði háttað við húsnæði Litlu Hlíðar sem fram á að fara í sumar, hvort og hvernig þær muni hafa áhrif á skólastarfið og hvenær þær eru ráðgerðar.

Að lokum óskar foreldraráð Leikskólans Hlíð eftir fundir með stjórnendum leikskólans ásamt skólaog frístundarsviði og eignaskrifstofu Reykjavíkurborgar. Fyrir hönd foreldrafélags og foreldraráðs Leikskólans Hlíð,

Áslaug Magnúsdóttir

Björgvin Páll Gústavsson

Fríða Sigurðardóttir

Kristján Hjálmarsson

Rakel Tanja Bjarnadóttir

Reykjavík Leikskólar Mygla Skóla - og menntamál

Tengdar fréttir

Ó­vissa varðandi leik­skólann Hlíð: „Erum í raun á hrak­hólum“

Loka þurfti stærstum hluta húsnæðis leikskólans Hlíðar í lok október vegna myglu. Börn, foreldrar og starfsfólk þurfa að ferðast langar leiðir daglega á leikskóla í önnur hverfi borgarinnar. Bugaðir foreldrar þrýsta á Reykjavíkurborg og vilja að mögulega verði slakað á kröfum tímabundið varðandi húsnæði.

Mygla í nokkrum leikskólum til viðbótar, borgin bregðist hraðar við

Mygla hefur fundist á nokkrum leikskólum í Reykjavík og bætast þeir þar með í sístækkandi hóp grunn-og leikskóla sem glíma við mygluvanda. Sviðsstjóri skóla-og frístundasviðs segir mun betur fylgst með húsnæði en áður. Ekki er ljóst hvort myglan muni hafa áhrif á starfsemi skólanna.

Mest lesið


Fleiri fréttir

Sjá meira


×

Mest lesið