Kaup­máttur ráð­stöfunar­tekna dregist saman

Þetta kemur fram í tilkynningu frá Hagstofunni.

Þar segir að áætlað sé að ráðstöfunartekjur heimilageirans hafi aukist um 8,5 prósent á fyrsta ársfjórðungi 2023 í samanburði við sama tímabil fyrra árs.

Ráðstöfunartekjur á mann numu rúmlega 1,26 milljónum króna á ársfjórðungnum og jukust um 4,7 prósent frá sama tímabili í fyrra. 

Að teknu tilliti til verðlagsþróunar er áætlað að kaupmáttur ráðstöfunartekna á mann hafi dregist saman um 4,8 prósent á tímabilinu.

Launatekjur vegi þyngst í heildartekjum heimilanna

Einnig kemur fram í tilkynningunni að heildartekjur heimilanna hafi aukist um 11,5 prósent á fyrsta ársfjórðungi 2023 samanborið við sama ársfjórðung í fyrra. Sá liður sem vegur hvað þyngst í aukningu heildartekna er launatekjur en þær jukust um 13,4 prósent frá sama ársfjórðungi á síðasta ári. 

Áætlað er að eignatekjur hafi aukist um 12 prósent frá sama ársfjórðungi í fyrra en áætlað er að vaxtatekjur hafi aukist um 61,8 prósent á tímabilinu.

Lífeyristekjur og félagslegar tilfærslur jukust um 6,6 prósent á fyrsta ársfjórðungi 2023 samanborið við fyrsta ársfjórðung árið 2022. Hækkun lífeyristekna um 18,3 prósent er sá liður sem vegur hvað þyngst í hækkuninni.

Heildargjöld heimilanna aukist meira en heildartekjur

Áætlað er að heildargjöld heimilanna hafi aukist um 15,5 prósent á fyrsta ársfjórðungi 2023 samanborið við sama ársfjórðung í fyrra. Skattgreiðslur jukust um 7,7 prósent frá sama ársfjórðungi í fyrra og er áætlað að tryggingagjöld hafi aukist um 14,3 prósent á tímabilinu. 

Eignagjöld jukust um 58 prósent á fyrsta ársfjórðungi 2023 samanborið við sama ársfjórðung í fyrra. Þar af jukust vaxtagjöld um 60 prósent sem einkum skýrist af mikilli hækkun vaxta.

Þessar niðurstöður Hagstofunnar eru einungis bráðabirgðaniðurstöður en það munu birtast endurskoðaðar þegar endanlegri upplýsingar, meðal annars úr skattframtölum fyrirtækja og einstaklinga, liggja fyrir.