Vill upp­lýsingar um bótasvik ör­yrkja

Í fyrirspurn Birgirs spyr hann sérstaklega út í þær rannsóknir og niðurstöður sem liggja fyrir um bótasvik þar sem „einstaklingar eru metnir öryrkjar án þess að gildar ástæður liggi þar að baki“.

Velferðarnefnd Alþingis hefur nú til umfjöllunar frumvarp um heildarendurskoðun á örorkulífeyriskerfinu. Hagsmunasamtök öryrkja og fatlaðs fólks hafa fagnað sumum af þeim breytingum sem lagðar eru til í frumvarpinu en gagnrýnt aðrar harðlega.  

Veltir fjölgun öryrkja fyrir sér

Birgir beinir nú sjónum að orörkumatinu og hvernig staðið sé að eftirliti með því að matið sé reist á raunhæfum forsendum þeirra sem í hlut eiga. 

Birgir veltir sömuleiðis fyrir sér fjölgun öryrkja og spyr ráðherra hvaða ástæður liggi að baki eins örri fjölgun örorkulíferyrisþega undanfarin ár. 

Frá aldamótum hefur fjöldi öryrkja ríflega tvöfaldast. Þegar frá því var greint árið 2019 taldi formaður velferðarnefndar Alþingis streitu og kulnun á vinnumarkaði stóra ástæðu og sagði ljóst að stytta þyrfti vinnuvikuna. 

Birgir er ekki sá fyrsti innan Sjálfstæðisflokksins sem veltir fyrir sér hvort öryrkjar og bótaþegar sigli undir fölsku flaggi. Brynjar Níelsson sagði til að mynda í hlaðvarpi Sölva Tryggvasonar fyrir fjórum árum að girða þurfi fyrir misnotkun á kerfinu.

Gert er ráð fyrir að fyrrgreint örorkufrumvarp verði til umræðu í þingsal í næstu viku. Nokkur umræða hefur skapast í kringum frumvarpið og hefur Jóhann Páll Jóhannsson þingmaður Samfylkingarinnar boðið öryrkjum til samráðsfundar um breytingarnar í hátíðarsal Smiðju á þriðjudag. 

Í frumvarpinu er meðal annars lögð til sameining á greiðsluflokkum og einföldun á skerðingarreglum, en jafnframt er innleitt starfsgetumat sem er ætlað að taka mið af félagslegum og heilsufarslegum þáttum.