Sjáðu sex­tán ára stelpu koma meisturunum til bjargar

Staðan var enn markalaus þegar komið var fram á 90. mínútu en þá kom yngsti leikmaður Valsliðsins til bjargar.

Hin sextán ára gamla Ragnheiður Þórunn Jónsdóttir fékk fyrirgjöf frá Önnu Rakel Pétursdóttir, lagði hann fyrir sig með lærinu og afgreiddi boltann svo í markið.

Frábær afgreiðsla hjá Ragnheiði Þórunni og hennar annað mark fyrir Val í sumar.

Ragnheiður Þórunn kom til Vals frá Haukum fyrir tímabilið en hún heldur ekki upp á sautján ára afmælið sitt fyrr en í nóvember næstkomandi.

Hér fyrir neðan má sjá þetta mikilvæga mark sem og sigurmark FH í leik liðsins á móti Þór/KA fyrir norðan. Það var Ída Marín Hermannsdóttir sem tryggði FH-stelpum öll stigin. Ída bæði fiskaði vítið og skoraði af öryggi úr vítaspyrnunni.