Yfir 190 gestir Fabrikkunnar með nóró­veiru síðasta sumar

Í nýrri ársskýrslu sóttvarnalæknis fyrir árið 2023 segir að í júlímánuði hafi borist tilkynningar um einkenni frá meltingarvegi frá fólki sem hafði borðað á veitingahúsi sem var þá rekinn á tveimur stöðum, í Kringlunni og Höfðatorgi. 

Umfangsmikil rannsókn þeirra hafi svo leitt í ljós að yfir 190 gestir hafi fengið einkenni eins og uppköst, niðurgang og hita sem mátti rekja til nóróveirusýkingar . Í skýrslunni segir að uppruni smitsins í þessari hópsýkingu hafi ekki verið rakinn til ákveðinna matvæla.

Í skýrslunni segir að nóróveira smitist auðveldlega á milli einstaklinga með snertismiti en að hún geti líka borist með dropum eða úða í lofti. Veiran geti einnig lifað lengi á yfirborði, til dæmis á hurðarhúnum. Önnur algeng smitleið sé með fæðu og að mengun matvæla frá sýktum einstaklingum sé einnig algeng smitleið þó veiran geti einnig verið í fæðunni í til dæmist ostrum úr menguðu vatni.

Töluvert var fjallað um málið síðasta sumar og var þá talað um að allt að hundrað gætu verið sýktir. Í tilkynningu frá Hamborgarafabrikkunni kom fram að staðirnir hefðu báðir verið sótthreinsaðir. Sýni voru auk þess tekin úr hráefnum sem öll reyndust svo neikvæð og ekkert því sem benti til þess að sýkingin hefði komið þaðan. Hamborgarafabrikkan endurgreiddi öllu gestum sem smituðust matinn sem þau borðuðu.

Ferðamenn og eldri borgarar

Í skýrslu sóttvarnarlæknis er einnig fjallað um aðrar hópsýkingar í fyrra. Þar kemur til dæmis fram að í júlí hafi einnig komið upp sýking í tveimur hópum ferðamanna á landsbyggðinni sem talið er að hafi átt upptök sín á veitingahúsi en veikindi höfðu verið meðal starfsfólks veitingastaðarins.

Annars vegar var um að ræða hóp erlendra ferðamanna og hins vegar hóp innlendra eldri borgara. Samtals veiktust 12 einstaklingar og fjórir þeirra þurftu innlögn á sjúkrahús. Nóróveira reyndist vera orsakavaldurinn.

Þá barst í maí í fyrra tilkynning um hópsýkingu eftir matarboð í heimahúsi. Átta af níu manna hópi fengu einkenni frá meltingarvegi og reyndist nóróveira sýkingarvaldurinn. Í skýrslu sóttvarnalæknis segir að líklegast sé að smit hafi þarna orðið frá barni í hópnum, sem daginn fyrir veisluna var með sýkingareinkenni.