Árni tekur við Fylki af Rúnari

Ljóst er að Fylkir mun spila í Lengjudeildinni næsta sumar eftir tap fyrir HK fyrir nýafstaðið landsleikjahlé. Rúnar Páll greindi frá því eftir þann leik að hann hyggðist hætta í Árbænum eftir leiktíðina. Rúnar verður að vísu ekki á hliðarlínunni í þeim tveimur leikjum sem Fylkir á eftir þar sem hann verður í leikbanni en mun þó stýra æfingum liðsins næstu tvær vikur.

Árni Freyr mun taka við keflinu af Rúnari að tímabilinu loknu en aðeins er um mánuður síðan að hann skrifaði undir tveggja ára samning við ÍR. Árni hefur náð góðum árangri í neðra Breiðholti sem þjálfari liðsins undanfarin tvö ár.

ÍR komst upp úr 2. deildinni undir hans stjórn sumarið 2023 og var í baráttunni um Bestu deildar sæti á sínu fyrsta tímabili í Lengjudeildinni í sumar. ÍR tapaði fyrir Keflavík í undanúrslitum umspils um Bestu deildar sæti, umspil sem Afturelding vann.

Árni þekkir til í Árbænum en hann spilaði fyrir Fylki sumrin 2012 og 2013. Hann skoraði fjögur mörk í 26 leikjum í deild og bikar.

„Það er mikill heiður fyrir mig að snúa aftur til Fylkis og að fá nú tækifæri til að þjálfa Fylkisliðið. Mitt mat er að það sé mjög mikið spunnið í liðið og með vinnusemi og metnað að leiðarljósi er ég sannfærður um að við munum skila góðri frammistöðu í framtíðinni. Hér í Árbænum eru aðstæður til fyrirmyndar og ég hlakka til að hefja störf fyrir Fylki,“ er haft eftir Árna í tilkynningu Fylkis.

Líklegt þykir að Jóhann Birnir Guðmundsson, sem stýrði ÍR ásamt Árna, taki við keflinu í Breiðholti.