Svona líta öll átta liða úrslitin í Evrópu út

Valur Páll Eiríksson skrifar 14. mars 2025 10:02

Líkt og svo oft áður er Real Madrid í 8-liða úrslitum Meistaradeildar Evrópu. AP Photo/Manu Fernandez

Í gærkvöld kláruðust 16-liða úrslit í Evrópudeild og Sambandsdeild karla í fótbolta og ljóst hvernig átta liða úrslitin líta út í öllum þremur Evrópukeppnum UEFA.

16-liða úrslit Meistaradeildar Evrópu kláruðust í fyrrakvöld og síðustu ár hefði þurft að bíða þess að dregið yrði í næstu umferð. Vegna nýs fyrirkomulags á Evrópukeppnunum liggur hins vegar fyrir hvernig keppnirnar líta út allt til loka.

Að neðan má sjá hvernig útlitið er fyrir framhaldið í keppnunum.

Meistaradeild Evrópu

Arsenal og Aston Villa eru fulltrúar Englands í Meistaradeildinni en ljóst er að aðeins annað þeirra hefur kost á að komast í úrslitin, enda eru þau innan sama hluta keppninnar. Vinni þau sína leiki mætast þau í undanúrslitum.

PSG sló Liverpool út eftir vítaspyrnukeppni.AP Photo/Jon Super

Líklegt þykir þó að Paris Saint-Germain slái lærisveina Unai Emery úr leik eftir frábæra frammistöðu gegn Liverpool og þá er verkefni Arsenal ekki einfalt, er liðið mætir Real Madrid.

Barcelona mætir Borussia Dortmund hinu megin og vinni Börsungar bíður þeirra annað hvort lið Bayern Munchen eða Inter Milan.

8-liða úrslit

Paris Saint-Germain - Aston Villa
Arsenal - Real Madrid
Barcelona - Borussia Dortmund
Bayern Munchen - Inter Milan

Líkt og PSG þurfti Real Madrid vítakeppni til að slá grannana í Atlético úr leik.Thomas COEX / AFP

Undanúrslit

PSG/Aston Villa - Arsenal/Real Madrid
Barcelona/Dortmund - Bayern/Inter

Evrópudeildin

Einnig eru tvö ensk lið í 8-liða úrslitum Evrópudeildarinnar. Tottenham og Manchester United geta mæst í úrslitum, komist liðin svo langt. Tottenham mætir Frankfurt og svo annað hvort Bodö/Glimt eða Lazio í undanúrslitum.

Bruno Fernandes skoraði þrennu til að skjóta United áfram.AP Photo/Dave Thompson

Manchester United sló Orra Stein Óskarsson og félaga í Real Sociedad úr keppni í gær. Næst mætir liðið Lyon og vinnist franska liðið er það annað hvort Rangers frá Glasgow eða baskaliðið Athletic Bilbao.

8-liða úrslit

Bodö/Glimt - Lazio
Tottenham - Frankfurt
Rangers - Athletic Bilbao
Lyon - Manchester United

Wilson Odobert skoraði tvö þegar Spurs fóru áfram í gær.AP Photo/Ian Walton

Undanúrslit

Bodö/Lazio - Tottenham/Frankfurt
Rangers/Athletic - Lyon/Man Utd

Sambandsdeildin

Chelsea þykir langlíklegast til árangurs í Sambandsdeildinni, en Albert Guðmundsson og félagar hans í Fiorentina auk Real Betis eru talin líkleg í úrslit. Albert skoraði eitt marka Fiorentina sem sló Sverri Inga Ingason og félaga í Panathinaikos úr keppni í gær.

Albert skoraði í gær en lið hans hefur tapað í úrslitum keppninnar tvö ár í röð.Image Photo Agency/Getty Images

Fiorentina hefur farið í úrslit keppninnar tvö ár í röð, í bæði skipti án árangurs. Liðið tapaði fyrir West Ham í úrslitum 2023 og fyrir Olympiakos í fyrra. Það er því spurning hvort allt sé þegar þrennt er hjá fjólubláum.

Chelsea þarf að komast í gegnum Legiu frá Varsjá og svo annað hvort Djugården eða Rapid Wien til að fara í úrslit.