Segir Alþjóðaólympíunefndina „í raun samseka“ rúss­neskum glæpum

Í færslu á X hefur hann birt myndband frá Kænugarði. Í færslunni gagnrýnir hann Alþjóðaólympíunefndina harðlega.

„Í hverri viku snúa sífellt fleiri rússneskir íþróttamenn aftur á alþjóðlega keppnisvelli, á meðan Úkraínumenn halda áfram að búa við mannúðarslys af völdum rússneskra árása. Þegar IOC auðveldar rússneskan áróður verða samtökin í raun samsek í þessum glæpum,“ skrifar Heraskevych.

„Styðjið Úkraínu í rétti sínum til að lifa,“ heldur hann áfram.

Heraskevych var dæmdur úr leik skömmu áður en hann átti að taka þátt í magasleðakeppninni á Ólympíuleikunum í síðustu viku. Ástæðan var sú að hann vildi keppa með hjálm sem sýndi úkraínska íþróttamenn sem fallið hafa í stríði Rússlands gegn Úkraínu.

Það taldi Alþjóðaólympíunefndin vera brot á reglum.

Heraskevych notaði hjálminn á sex opinberum æfingum á Ólympíuleikunum en fékk síðar skilaboð frá Alþjóðaólympíunefndinni um að hann yrði ekki leyfður í keppninni.

Á Ólympíuleikunum hafa þrettán rússneskir og sjö hvítrússneskir íþróttamenn fengið grænt ljós til að keppa undir svokölluðu hlutleysi.

Alþjóðaólympíunefndin útilokaði fyrst alla íþróttamenn frá Rússlandi og Hvíta-Rússlandi eftir innrásina í Úkraínu árið 2022 en opnaði síðar fyrir þátttöku undir hlutlausum fána.