„Leyfa morðingjum og vitorðsmönnum þeirra að keppa á Ólympíumótinu“

Óskar Ófeigur Jónsson skrifar 19. febrúar 2026 07:00

Rússneski fáninn verður mættur á Vetrarólympíumót fatlaðra sem tekur við af Ólympíuleikunum í Mílanó og Cortina. Getty/Maksim Konstantinov

Úkraínsk yfirvöld eru vægast sagt ævareið yfir þátttöku Rússa á Ólympíumóti fatlaðra.

Íþróttamálaráðherra Úkraínu gagnrýnir harðlega ákvörðunina um að sex íþróttamenn frá Rússlandi og fjórir frá Hvíta-Rússlandi fái að taka þátt í Ólympíumóti fatlaðra með því að keppa undir eigin þjóðartáknum.

Alþjóðaólympíunefnd fatlaðra (IPC) tilkynnti á fimmtudag um boðið sem íþróttamönnunum tíu hefur verið sent.

Þessi aðgerð fær úkraínska íþróttamálaráðherrann Matviy Bidny til að spara ekki stóru orðin.

Bæði vonbrigði og hneyksli

„Ákvörðun skipuleggjenda Ólympíumóts fatlaðra um að leyfa morðingjum og vitorðsmönnum þeirra að keppa á Ólympíumóti fatlaðra undir þjóðfánum er bæði vonbrigði og hneyksli,“ skrifar Matviy Bidny á X.

Alþjóðaólympíunefnd fatlaðra ákvað í september í fyrra að aflétta takmörkunum gegn Rússlandi og Hvíta-Rússlandi. Það opnaði fyrir að íþróttamenn frá löndunum gætu tekið þátt í Ólympíumóti fatlaðra með fána og þjóðartákn.

Hins vegar gerðu refsiaðgerðir hinna ýmsu sérsambanda það ómögulegt fyrir íþróttamenn frá löndunum að komast á Ólympíumót fatlaðra í tæka tíð. Fyrst í desember var leiðin til keppni opnuð aftur með úrskurði í Alþjóðaíþróttadómstólnum.

Nú hefur IPC ákveðið að bjóða tíu íþróttamönnum frá þessum tveimur þjóðum að taka þátt í leikunum.

Glenn Micallef, íþróttamálastjóri Evrópusambandsins, kallaði ákvörðunina „óásættanlega“ og sagði að hann myndi sniðganga opnunarhátíðina.

Þetta er óásættanlegt

„Þetta er óásættanlegt. Á meðan árásarstríð Rússlands gegn Úkraínu heldur áfram get ég ekki stutt endurupptöku þjóðartákna, fána, þjóðsöngva og einkennisbúninga sem eru órjúfanlegur hluti af þeim átökum,“ skrifaði hinn 36 ára gamli Maltverji á X.

„Af þessari ástæðu mun ég ekki vera viðstaddur opnunarhátíð Paralympics,“ skrifaði Glenn Micallef.

Rússlandi voru úthlutuð tvö sæti í alpagreinum, tvö í skíðagöngu og tvö á snjóbrettum. Fjögur sæti Hvíta-Rússlands eru öll í skíðagöngu.

Keppa á jafnréttisgrundvelli

IPC tekur skýrt fram að Rússar og Hvít-Rússar keppi á jafnréttisgrundvelli við aðra þátttakendur á Ólympíumóti fatlaðra.

„Farið verður með íþróttamennina nákvæmlega eins og þátttakendur á Ólympíumóti fatlaðra frá öðrum löndum,“ segir IPC í yfirlýsingu til fréttastofunnar AFP.

Rússlandi og Hvíta-Rússlandi hefur verið haldið utan keppni síðan Rússland réðst inn í Úkraínu árið 2022.