Sjáðu dauða­færi Ís­lands og mörkin fjögur

Mörkin og öll helstu atvik úr leiknum má sjá hér að neðan.

Ágúst Orri Þorsteinsson kom sér í dauðafæri snemma leiks en skot hans var varið.

Mexíkóar skoruðu svo tvö mörk í fyrri hálfleiknum, með tveggja mínútna millibili, eftir að hafa sótt fram vinstra megin og komið boltanum inn í teiginn. Richard Ledezma og Armando González skoruðu mörkin. 

Í seinni hálfleik skoraði svo Jesús Gallardo með skalla, einn og óvaldaður eftir hornspyrnu, og í lokin nýtti Brian Gutierrez sér mistök Höskuldar Gunnlaugssonar, komst einn gegn markverði og skoraði.

Varamaðurinn Baldur Kári Helgason var nálægt því að minnka muninn á lokamínútunni en hitti ekki markið.

Ágúst Orri og Baldur Kári voru í hópi átta leikmanna Íslands sem spiluðu sinn fyrsta A-landsleik í nótt. Emil Atlason, Karl Friðleifur Gunnarsson, Helgi Guðjónsson og Ágúst Orri voru í byrjunarliðinu, og þeir Óskar Borgþórsson, Hallgrímur Mar Steingrímsson, Hans Viktor Guðmundsson og Baldur Kári komu svo inn á í seinni hálfleiknum.