FH-ingar boða til blaða­manna­fundar

FH sendi út fundarboð í dag en eins og greint var frá á vef Handkastsins á mánudaginn má reikna með því að Aron Pálmarsson verði á fundinum kynntur sem nýr aðalþjálfari FH. Miðillinn segir jafnframt að fráfarandi aðalþjálfari, Sigursteinn Arndal, komi til með að verða aðstoðarþjálfari liðsins.

Aron kom inn í þjálfarateymi FH í febrúar síðastliðnum og tók að sér að stýra sóknarleik liðsins. Áður var hann sérstakur ráðgjafi handknattleiksdeildar félagsins en það er staða sem hann tók við sumarið 2025.

Síðasta haust sagðist Aron ekki hafa áhuga á þjálfun en ljóst er að sú skoðun hans hefur breyst. Hann var þannig áberandi í úrslitakeppninni nú í vor þar sem hann stýrði oft leikhléum liðsins og stillti sóknarleikinn af. FH tapaði fyrir Val í oddaleik eftir æsispennandi einvígi um Íslandsmeistaratitilinn.

Sigursteinn hefur verið þjálfari FH frá árinu 2019 og stýrði liðinu til Íslandsmeistaratitils árið 2024. Þá var Aron leikmaður liðsins.

Aron lauk ferli sínum sem leikmaður á síðasta ári þar sem hann spilaði eina leiktíð með Veszprem í Ungverjalandi eftir að hafa komið heim í FH og unnið Íslandsmeistaratitilinn vorið 2024.

Hann er einn allra besti handboltamaður sögunnar og raðaði inn titlum með Kiel, Barcelona, Veszprem og Álaborg í Danmörku.

Hann vann þýsku úrvalsdeildina fimm sinnum, þá spænsku fjórum sinnum og þá ungversku tvisvar. Þá vann hann Meistaradeild Evrópu þrisvar, einu sinni með Barcelona og tvisvar með Kiel.

Aron skoraði 576 mörk í 148 landsleikjum fyrir Ísland og vann með liðinu brons á EM 2010.