Kjúk­lingur kostnaður fyrir treyjunúmerið

Miller hefur verið meðal betri varnarmanna í deildinni á þessari öld en aðeins hefur hallað undan fæti eftir að hann varð fyrir slæmum meiðslum sem leikmaður Buffalo Bills fyrir tveimur árum.

Cowboys tók séns á honum í sumar en þá blasti við eitt vandamál. Treyjunúmerið 40, sem Miller hefur borið með bæði Los Angeles Rams og Buffalo Bills, sem og í menntaskóla og háskóla, var upptekið.

Hunter Luepke bar númerið og báðir æfðu í treyjum númer 40 í æfingabúðum í sumar.

Miller fékk loks númerið alfarið í gær eftir að hafa náð samkomulagi við Luepke. Luepke færði sig yfir í treyju númer 30 þar sem Miller gaf honum hluta af kjúklingabúi sem hann rekur.

„Ég verð að hrósa Hunter. Hann hefur lært af bestu samningsviðræðumönnum hér hjá Cowboys. Samningaviðræður stóðu fram á síðustu stundu en þetta tókst. Ég vil ekki segja frá smáatriðum en ég lýsi því glaður yfir að hann er viðskiptafélagi minn í dag. Hann á hluta í Greener Pastures Chicken. Kjúklingi meistaranna,“ segir Miller.

Fleiri núverandi og fyrrverandi NFL-leikmenn eiga hluta í fyrirtækinu. Þar á meðal Patrick Mahomes, Drew Brees og Nick Foles.

NFL-deildin hefur göngu sína á miðvikudagskvöldið næsta og leikir verða í beinni útsendingu á rásum Sýnar Sport í allan vetur.