Vill að herinn hverfi frá Afrin

Herlið Tyrklands í Afrin-héraði Sýrlands ætti að snúa heim og láta af aðgerðum gegn YPG, hersveitum sýrlenskra Kúrda. Þetta sagði Pervin Buldan, nýkjörinn leiðtogi flokks Kúrda (HDP), í Tyrklandi í gær. Líklega munu orð hennar þó hafa lítil áhrif á Recep Tayyip Erdogan forseta sem hefur látið handtaka fjölda fólks fyrir að mótmæla aðgerðunum á samfélagsmiðlum.

Buldan var kjörin leiðtogi HDP á sunnudag. Hún er ein þeirra sem tyrkneska lögreglan rannsakar um þessar mundir fyrir að lýsa yfir andstöðu við aðgerðir hersins í Afrin. Alls hafa á sjöunda hundrað verið handtekin frá því aðgerðirnar hófust.