Verst geymda leyndar­mál Ís­lands að ég væri á leið í Val

Í gær gekk hinn 24 ára gamli Tryggvi Hrafn Haraldsson í raðir Íslandsmeistara Vals frá ÍA. Undir lok tímabils hér heima síðasta sumar fór Tryggvi Hrafn á láni til norska B-deildarfélagsins Lilleström og hjálpaði liðinu að tryggja sér sæti í úrvalsdeildinni þar í landi.

Fyrir það var hann ítrekað orðaður við Val og í dag samdi hann við félagið. Þar mun hann leika ásamt Arnóri Smárasyni, samherja sínum hjá Lilleström, en Arnór samdi við félagið nýverið.

„Þeir eru búnir að vera í sambandi við mig síðan í sumar og á meðan ég var úti. Aðdragandinn var þannig séð langur en ákvörðunin var tekin fyrir stuttu. Ég náði samkomulagi við Val í sumar og það var ekkert annað í boði á Íslandi en að fara í Val,“ sagði Tryggvi Hrafn meðal annars í viðtalinu við Fótbolta.net.

Skagamaðurinn knái segir einnig að honum hafi litist betur á að koma heim til Íslands og leika með Val heldur en að taka slaginn með Lilleström í Noregi. Hann útilokar þó ekki að spila erlendis þegar fram líða stundir. Hann hefur nú þegar ágætis reynslu af því en hann lék með Halmstad í Svíþjóð frá 2017 til 2018.

„Það eru kostir báðum megin, maður þarf að horfa á þetta út frá öllum þáttum. Mér finnst heillandi að fara í lið sem ætla að vera best og ætla að vinna allt,“ sagði sóknarmaðurinn um hvað heillaði mest við Val.

„Það vita það allir að Valur stefnir á titla á hverju tímabili og það verður markmiðið áfram. Til að vera samkeppnishæfir þá þarf stóran og góðan hóp. Ég held að ég passi fínt þarna inn í. Ég vil halda boltanum og spila góðan sóknarbolta. Ég er spenntur að byrja þetta,“ sagði Tryggvi Hrafn Haraldsson að lokum.