Grunur um myglu á Kvista­borg: „Talað fyrir daufum eyrum,“ segir leik­skóla­stjórinn

Þetta kemur fram í tölvupósti sem leikskólastjórinn Guðrún Gunnarsdóttir sendi foreldrum 20. apríl síðastliðinn. Samkvæmt heimildum Vísis komu tíðindin flatt upp á foreldra en samkvæmt póstinum átti það einnig við um starfsmenn leikskólans.

Þannig segist leikskólastjórinn ekki hafa getað veitt upplýsingar um málið fyrr en nú en í póstinum er vitnað í skýrslu sem verkfræðistofan Mannvit vann í maí/júní í fyrra en stjórnendur Kvistaborgar fengu ekki afhenta fyrr en í mars síðastliðnum.

„Í stuttu máli þá staðfestu niðurstöður það sem við nokkurn veginn vissum, þ.e. að loftið er of staðið og oft og tíðum erum við að slást um súrefnið, of margir í sama rými. Þrátt fyrir að vera meistarar í því að opna glugga þá dugar það ekki alltaf til í veðursældinni í dalnum. Þetta er verkefni sem við erum að skoða,“ segir Guðrún í póstinum.

Þá hafi greining Náttúrufræðistofnunar Íslands á ryksýni bent til þess að ástæða væri til að skoða svokallaða „gryfju“ milli tveggja deilda og kanna möguleika á rakaskemmdum.

„Í sýninu fannst töluvert af sveppagróum sem komið höfðu inn með útiloftinu en einnig fannst sveppagró sem gæti átt uppruna sinn innanhúss eða utanhúss. Því er talin ástæða til að skoða rýmið betur og útiloka mögulega mengun frá rakaskemmdum innanhúss,“ segir Guðrún.

Þá segir hún að gryfjunni hafi umsvifalaust verið lokað þegar skólastjórnendur fengu skýrsluna í hendur 11. mars síðastliðinn.

„Aðeins sérvalið leikefni sem fer fyrst í sótthreinsun“

Guðrún segir í póstinum að hugsanlega sé raki í veggjum og gólfum sem þurfi að rannsaka betur. Hann sé ekki sýnilegur í dag en síðast hafi lekið inn á deildina Asparlund vorið 2020 og farið í viðgerðir í júlí sama ár.

„Ég hef ætíð óskað eftir betri myglu-sýnatöku í Kvistaborg en talað fyrir daufum eyrum. Ég fór þá leið að panta sjálf sýnatöku frá Eflu verkfræðistofu fyrir Kvistaborg, í kjölfarið á niðurstöðum frá Mannviti. Það er búið að taka nokkur sýni á þessum tveimur stöðum þar sem á að fara í framkvæmdir, Asparlundi og gryfjunni.

Mygla eða ekki mygla, það vitum við ekki fyrir víst, en við bíðum eftir niðurstöðum í skýrslu frá Eflu. Þegar skýrslan berst mun ég upplýsa ykkur nánar um stöðu mála,“ segir leikskólastjóri í póstinum til foreldra.

Asparlundur og Reynilundur, deildirnar þar sem elstu börnin dvelja, hafa frá og með deginum í dag verið fluttar í skátaheimilið og verða þar á meðan framkvæmdir standa yfir, sem eru sagðar munu taka einhverja mánuði.

Í póstinum er tekið fram að engin húsgögn verði flutt í skátaheimilið, „aðeins sérvalið leikefni sem fer fyrst í sótthreinsun.“

„Það eru alltaf einhver verkefni, sum alveg óumbeðin eins og þetta. Það þýðir ekkert annað en að stilla hugarfarið og líta á þetta verkefni sem svolítið ævintýri,“ segir Guðrún.

„Þetta er óumflýjanlegt og við viljum ekki vera í Kvistaborg í einhverju iðnaðarryki sem svo auk þess er kannski er mengað af myglu. Við viljum út úr húsinu og láta börn og starfsmenn njóta vafans. Ég segi, þetta er svolítið vont gott vesen en það er tilhlökkun að komast í meira rými, því við erum aðþrengd í dag og við fáum betri Kvistaborg fyrir framtíðina.“