Fótbolti

Blikar mæta Loga, Shakhtar og Shamrock

Ingvi Þór Sæmundsson skrifar
Breiðablik tekur í annað sinn þátt í aðalkeppni Sambandsdeildar Evrópu.
Breiðablik tekur í annað sinn þátt í aðalkeppni Sambandsdeildar Evrópu. vísir/ernir

Vísir var með beina útsendingu frá drættinum í Evrópu- og Sambandsdeildina í fótbolta karla í dag. Breiðablik var á meðal liða í pottinum í Sambandsdeildinni og nú er ljóst hvaða sex liðum Blikar mæta.

Breiðablik var í 5. styrkleikaflokki í Sambandsdeildardrættinum og dróst gegn einu liði úr hverjum flokkanna sex.

Alls eru 36 lið í keppninni en hvert lið leikur þrjá leiki á heimavelli og þrjá á útivelli. Efstu átta liðin komast beint áfram í sextán liða úrslit en liðin í sætum 9-24 fara í umspil. Liðin í 25.-36. sæti detta út.

Hér að neðan má sjá leikina sem Blikar spila en þeir mæta meðal annars úkraínska stórveldinu Shakhtar Donetsk og írska liðinu Shamrock Rovers, sem og tyrkneska liðinu Samsunspor sem Logi Tómasson spilar með. Dagsetningar leikjanna ættu að liggja fyrir á sunnudaginn en deildin hefst í september og stendur yfir fram að jólum.

Leikir Breiðabliks og annarra liða sem voru í 5. styrkleikaflokki. Blikar mæta Shamrock Rovers og Shakhtar Donetsk úr efstu styrkleikaflokkunum.UEFA

Útileikir Blika verða við Shakhtar, sem spilað hefur sína heimaleiki í Póllandi og Slóveníu, Strasbourg (Frakkland) og Lausanne-Sport (Sviss). Heimaleikir Breiðabliks verða við KuPS frá Finnlandi, Shamrock Rovers og Samsunspor.

Blikar mæta hins vegar hvorki ensku bikarmeisturunum í Crystal Palace né Fiorentina, liði Alberts Guðmundssonar. Hér að neðan má sjá leiki Fiorentina og annarra liða í efsta flokknum.

Leikir liðanna í 1. styrkleikaflokki. Hvert lið spilar sex leiki.UEFA

Palace var í 2. flokki og spilar meðal annars við AZ Alkmaar og Dynamo Kyiv. Í sama flokki var lið Lech Poznan sem Gísli Gottskálk Þórðarson spilar með. Gísli þarf meðal annars að glíma við spænska liðið Rayo Vallecano og þýska liðið Mainz.

Leikir liðanna í 2. styrkleikaflokki. Hvert lið spilar sex leiki.UEFA

Hér að neðan má sjá leiki liðanna í 3. styrkleikaflokki.

Leikir liðanna í 3. styrkleikaflokki. Hvert lið spilar sex leiki.UEFA

Hér að neðan má sjá leiki liðanna í 4. styrkleikaflokki.

Leikir liðanna í 4. styrkleikaflokki. Hvert lið spilar sex leiki.UEFA

Loks má sjá hér leiki liðanna í 6. styrkleikaflokki en í þeim hópi er meðal annars armenska liðið FC Noah sem Guðmundur Þórarinsson er á mála hjá.

Leikir liðanna í 6. styrkleikaflokki. Hvert lið spilar sex leiki.UEFA

Í Evrópudeildinni eru einnig 36 lið í keppninni og leikur hvert þeirra fjóra heimaleiki og fjóra útileiki. Eins og í Sambandsdeildinni komast efstu átta liðin beint í sextán liða úrslit, liðin í sætum 9-24 fara í umspil og neðstu tólf liðin falla úr leik.

Í greininni hér að neðan má lesa um dráttinn í Evrópudeildinni en þar leika meðal annars  ensku liðin Nottingham Forest og Aston Villa auk fjölda Íslendingaliða.




Fleiri fréttir

Sjá meira


×