Hinn fjöl­hæfi Viktor Ör­lygur er einnig fimur á sauma­vélinni

Leikmaðurinn fjölhæfi hannar og saumar snyrtitöskur og kortaveski úr leðri sem kemur úr bóndabæ langafa hans. Áður hefur verið fjallað um fjölhæfni Viktors Örlygs í tölvuleiknum Football Manager en þar getur hann leikið að því virðist allar stöður nema í marki þó hann hafi einnig spilað þar á sínum tíma.

„Þetta byrjaði fyrir alvöru fyrir svona einu og hálfu ári. Þá byrjaði ég að gera kortaveski og svo í janúar fékk í Covid-19 og fór aðeins að pæla í þessu, horfði á nokkur myndbönd og eftir það fór ég að gera snyrtitöskur. Fór til bólstrara, fékk afgangsleður þar og þá fór þetta að rúlla,“ sagði Viktor Örlygur um iðn sína.

„Þetta er mest bara Youtube, einhver myndbönd þar ásamt Instagram og Google, fullt af upplýsingum þar. Það eru ekkert rosalega margir í þessu á Íslandi,“ sagði Viktor Örlygur aðspurður hvar hann hefði lært fag sitt.

Leðrið hefur lengi verið í fjölskyldunni.

„Þetta er frá kindunum sem langafi átti, sem bróðir mömmu lét súta. Það var eitthvað til af því sem hafði ekki verið notað svo ég fékk það frá mömmu.“

„Það er smá biðlisti og ég for vonandi að vinna í honum bráðum. Það eru einhverjar pantanir komnar. Svo þegar ég er búinn að hanna betur töskurnar og fullkomna þær þá fer kannski alvöru framleiðsla í gang.“

Einn þeirra sem hefur fengið tösku er nýjasti leikmaður norska stórliðsins Rosenborg.

„Hún er geggjuð,“ sagði Kristall Máni Ingason um töskuna sem hann fékk frá samherja sínum.

„Það er alveg hægt að segja það. Að hafa eitthvað annað að gera en fótboltann þegar hann er í smá pásu yfir daginn. Þá er fínt að fara í þetta,“ sagði Viktor Örlygur að endingu í viðtali sem sjá má hér að neðan.

Leikur Víkings og The New Saints frá Wales hefst klukkan 19.30. Hann verður sýndur beint á Stöð 2 Sport en útsending hefst klukkan 19.20.