Rappsveitin sem sætti hryðjuverkarannsókn sleppur með skrekkinn

Meðlimir sveitarinnar og aðrir tónlistarmenn sem tróðu upp á þessari gríðarstóru tónlistarhátíð eru yfirlýstir stuðningsmenn sjálfsákvörðunarréttar Palestínumanna og ófeimnir við að viðra skoðanir sínar á framferði ísraelska hersins á Gasaströndinni.

Undirritaður ræddi við meðlimi Kneecap þegar þeir tróðu upp á Gauknum á vegum Iceland Airwaves um árið. Hér að neðan má lesa viðtalið.

Rannsókn heldur áfram á ummælum annarra tónlistarmanna sem komu fram á hátíðinni, fyrst og fremst Bob Vylan sem leiddi kór viðstaddra í níðsöng um ísraelska herinn sem hefur undanfarnar vikur kennt „tæknivillum“ um drónaárásir á borgara þar sem þeir ná sér í vatn í flóttamannabúðum og reifað áætlanir um að safna íbúum Gasasvæðisins saman í búðum. Áætlanir sem margir beggja megin samningaborðsins hafa líkt við gettó nasista.

Ákærður fyrir brot á hryðjuverkalögum fyrir ótengt atvik

Þann 28. júní síðastliðinn kom rappþríeykið Kneecap fram á einu sviði Glastonbury-hátíðarinnar fyrir tugum þúsunda. Þar hófu þeir að kyrja níðsöngva um ísraelska herinn og forsætisráðherra Bretlands, Keir Starmer, fyrir að aðhafast ekki.

Einn meðlima sveitarinnar, Liam Óg Ó hAnnaidh, sem gengur undir sviðsnafninu Mo Chara, hefur hins vegar verið ákærður fyrir brot gegn hryðjuverkalögum fyrir að hafa veifað fána Hezbollah-samtakanna alræmdu þegar hann kom fram í Lundúnum síðasta nóvember. Hann segist saklaus vera og fer fyrir dóm í ágúst.

Drengirnir í Kneecap greindu sjálfir frá þessum fréttum á samfélagsmiðlum. Þar sögðu þeir að þeim hefði borist tölvupóstur þar sem þeim var tjáð að ákæruvaldið hygðist ekki aðhafast neitt frekar.

„Við héldum sögulega tónleika á Glastonbury. Öllu svæðinu var lokað klukkutíma fyrr vegna troðnings. Þetta var hátíð ástar og samstöðu. Hafsjór af góðu fólki á heimsins stærstu tónlistarhátíð,“ segir í tilkynningu frá sveitinni.

Sönnunargögn ekki næg

Þeir segjast vera skotspónn ríkisvaldsins.

„Hver einn og einasti sem sá atriðið okkar vissi að engin lög voru brotin, ekki nærrum því. Samt sem áður taldi lögreglan það rétt að tilkynna um það opinberlega að þeir ætluðu að hefja rannsókn. Þetta er pólitískt. Þetta er markvisst. Þetta er hótun af hendi ríkisvaldsins,“ segja þeir.

Samkvæmt upplýsingum sem breska miðlinum Guardian bárust frá lögreglunni í Avon- og Somerset-sýslum var rannsókn hafin á ummælum sveitarinnar en að ekki hafi legið næg sönnunargögn fyrir til að höfða mál. Áfram verði haldið að rannsaka ummæli Bob Vylans fyrrnefnds.

Fyrr í mánuðinum brást Vylan við ásökunum á hendur sér um gyðingahatur og ofbeldishneigð. Hann sver þær af sér.

„Við styðjum ekki útrýmingu gyðinga, Araba eða nokkurs annars kynþáttar eða þjóðarhóps. Við styðjum niðurrif morðóðrar hermaskínu. Maskínu þar sem hermönnum var sagt að beita banvænu valdi að óþörfu gegn saklausum borgurum sem biðu eftir aðstoð. Maskínu sem hefur eyðilagt stóran hluta Gasa.“